Azərbaycanın basketbol üzrə millisinin üzvü: “Avropa çempionatına güclü hazırlaşdıq”

“On ay hər gün iki dəfə olmaqla məşqlər keçərək basketbol üzrə Avropa çempionatına güclü hazırlaşdıq”.

“Report”un məlumatına görə, bunu Andorrada keçirilən basketbol üzrə Avropa çempionatının C divizionunun qalibi, Azərbaycanın qızlardan ibarət U-16 yığmasının üzvü Leyla Allahverdiyeva deyib.

O, qeyd edib ki, komanda yoldaşları təcrübələrini artırıblar:

“Həmçinin bir sıra yarışlara qatılıb, təcrübəmizi artırdıq. Çox çalışdıq və C divizionunun birincisi olduq. Bizi dəstəkləyən hər kəsə təşəkkür edirəm”.

L.Allahverdiyeva yığmaya dəstək olanlara minnətdarlığını bildirib. “Bizim çox güclü komandamız var. Hər birimiz bütün potensialımızdan istifadə edərək, qalib olmaq üçün hər şey etdik”, - idmançı deyib.