“Real Madrid Foundation” Azərbaycanda - FOTO

Dünyanın müxtəlif ölkələrində məşhur futbol düşərgələri təşkil edən “Real Madrid Foundation” bu il “Real Madrid Foundation Azerbaijan Clinic” proqramını Azərbaycanda keçirəcək.

“Real Madrid Foundation” ilə 2023-cü ildə müvafiq əməkdaşlıq müqaviləsi imzalayan Footland şirkəti, 14-18 avqust 2023-cü il tarixlərində ABB-nin baş sponsorluğu ilə “Sabis Sun International School”un ərazisində futbol düşərgəsi keçirəcək.

Düşərgənin təşkilində məqsəd 6-17 yaş aralığında 150 uşağa futbol bacarıqlarını və idman dəyərlərini öyrətmək, bütün iştirakçıların unikal təcrübəyə yiyələnməsinə kömək göstərməkdir. Bu əməkdaşlıq beynəlxalq standartlara uyğun hazırlanıb. 5 gün ərzində gənc futbolçular unudulmaz təəssüratlar yaşayacaqlar.

“Real Madrid Foundation” yüksək səviyyəli futbol məşqçilərinin rəhbərliyi altında xüsusi təlimlər keçməklə onlara futbol bacarıqlarını inkişaf etdirmək imkanı təklif edir. Düşərgə qonaqlarının, o cümlədən uşaqların valideynlərinin əyləncəli vaxt keçirmələri üçün “Fan zona” yaradılacaq.

"Real Madrid Foundation Azerbaijan Clinic" futbol düşərgəsinin təşkilinə baş sponsor ABB ilə yanaşı, Visa və Epoint şirkətləri də tərəfdaşlıq dəstəyi göstərir.

Footland şirkətinin həmtəsisçiləri Zeynal Kərimzadə və Pərviz Nəcəfov “Real Madrid Foundation”la əməkdaşlıqdan məmnun olduqlarını bildiriblər: "Məqsədimiz ölkədə futbol sevgisini yeni səviyyəyə qaldırmaq, gənclərin "Real Madrid Foundation"un tanınmış məşqçilərindən birbaşa təcrübə əldə etmələrinə imkan yaratmaqdır. Dünyanın ən məşhur futbol klubunun metodologiyası, texnikası və idman dəyərləri ilə məşq etmək imkanı yaratdığımız üçün çox xoşbəxtik”.