Azərbaycan millisinin kapitanı: “Avropa çempionatında hamı “döyüşmək” istəyir”

“Avropa çempionatı elə yarışdır ki, burada hamı “döyüşmək” istəyir”.

Bunu “Report”a açıqlamasında qadın voleybolçulardan ibarət Azərbaycan millisinin kapitanı Ayşən Abduləzimova Almaniyada keçirilən Avropa çempionatı ilə bağlı danışarkən deyib.

30 yaşlı oyunçu qitə birinciliyinin C qrupu çərçivəsində ötən gün Yunanıstan üzərində çətin qələbə (3:2) qazandıqlarını etiraf edib: “Yunanıstanla oyun bizim üçün çox vacib idi. Rəqibə 1:3 hesabı ilə məğlub ola da bilərdik. Yəni Yunanıstanın bizə qalib gəlmək şansı var idi. Ancaq vəziyyəti lehimizə dəyişməyi bacardıq. Komandamla fəxr edirəm. Bu qələbə bizə çox lazım idi”.

Abduləzimova bu gün son turda İsveçlə keçiriləcək qarşılaşmada qələbə qazanmağı hədəflədiklərini vurğulayıb: “İsveçlə matçda uğurlu çıxış etməyə çalışacağıq. Sonda bizə dəstək olan azarkeşlərə təşəkkürümü bildirirəm”.

Qeyd edək ki, Azərbaycan – İsveç oyunu Bakı vaxtı ilə saat 22:00-da başlayacaq.