İngiltərə Premyer Liqası: “Liverpul” ardıcıl üçüncü dəfə qələbə qazanıb

İngiltərə Premyer Liqasının 4-cü turunda “Liverpul” evdə “Aston Villa”nı qəbul edib.

“Report” xəbər verir ki, qarşılaşma “Enfild”də baş tutub.

“Liverpul”un üstünlüyü ilə keçən oyunda hesab erkən açılıb. 3-cü dəqiqədə “Liverpul”un yeni səkkiz nömrəsi macarıstanlı Dominik Soboslai Premyer Liqada ilk qoluna imza atıb. 19 dəqiqə sonra keçən turun qəhrəmanı Darvin Nunyesin ötürməsindən top “Aston Villa”nın müdafiəçisi Metyu Keşə dəyərək qapıya daxil olub. Beləliklə, ilk hissə “qırmızılar”ın böyük üstünlüyü ilə başa çatıb.

İkinci hissədə də ümumi mənzərə dəyişməyib. 55-ci dəqiqədə Mersisayd təmsilçisinin misirli hücumçusu Məhəmməd Salah fərqlənib. Ona məhsuldar ötürməni Darvin Nunyes edib.

Bu qol oyundakı yekun hesabı müəyyənləşdirib – 3:0.

Qeyd edək ki, 4 oyundan sonra “Liverpul” Premyer Liqada 3-cü pillədə qərarlaşıb. Növbəti tur “Liverpul” səfərdə “Vulverhempton”la qarşılaşacaq. Birmingem təmsilçisi olan “Aston Villa” isə 11-ci pillədə qərarlaşıb və növbəti tur Londonun “Kristal Pelas”ı ilə üz-üzə gələcəklər.