Belçikalı futbolçu: “Meydanın durumu hər iki komandaya çətinlik törədəcək”

“Meydanın durumu hər iki komandaya çətinlik törədəcək”.

“Report”un məlumatına görə, bunu Belçika yığmasının futbolçusu Yuri Tilemans Azərbaycan millisinə qarşı keçiriləcək AVRO-2024-ün seçmə mərhələsinin oyunu ərəfəsində mətbuat konfransında deyib.

26 yaşlı yarımmüdafiəçi kapitan Kevin De Bruynenin yoxluğunu xüsusi vurğulayıb: “Hər iki tərəf topla oynamağı sevir. Bu baxımdan çətin mübarizə olacaq. De Bruynenin yoxluğunun bizim üçün çətinliyi var. Buna baxmayaraq, keyfiyyətli oyunçulara sahibik. Ələ düşən imkanlardan yararlanmağa çalışacağıq”.

O, gənc və təcrübəlilərin vəhdətindən formalaşan keyfiyyətli kollektiv olduqlarını söyləyib: “Komandaya qoşulan gənc futbolçular həyəcanlıdırlar, məşqlərdə özlərini yaxşı tərəfdən göstərirlər. Onlarla yanaşı, təcrübəlilərimiz də var. Hər kəs əsas heyətə düşməyə çalışır”.

Qeyd edək ki, sentyabrın 9-da “Dalğa Arena”da keçiriləcək Azərbaycan – Belçika matçı saat 17:00-da başlayacaq.