Dünya çempionatında tarixi uğur qazanmış Azərbaycan güləşçiləri Vətənə qayıdıb  

Serbiyanın paytaxtı Belqradda keçirilən dünya çempionatında tarixi uğura imza atan yunan-Roma güləşi üzrə Azərbaycan millisi Vətənə qayıdıb.

“Report” xəbər verir ki, Heydər Əliyev Beynəlxalq Aeroportunda millinin qarşılanma mərasimi olub. Millinin üzvlərini idmançıların yaxınları, jurnalistlər, ictimaiyyət nümayəndələri qarşılayıblar.

Qeyd edək ki, 2 qızıl 3 gümüş medal qazanan yığma 120 xal toplayaraq ilk dəfə komanda hesabında dünya çempionu olub. Daha öncə sərbəst güləşdə də belə bir uğurumuz olmayıb. Buna qədər ən yaxşı nəticələr sərbəst güləşdə 2009 və 2010, yunan-Roma güləşində isə 2015 və 2022-ci ildə qeydə alınıb. Həmin dünya çempionatlarında millilərimiz komanda hesabında 2-ci yeri tutub.

Yunan-Roma güləşi üzrə millimiz həm medalların əyarına, həm də toplanan xallara görə də dünya çempionatlarında Azərbaycan güləş yığmaları tarixinin ən yaxşı nəticəsinə imza atıb.

Mundialda İran ikinci (102), Türkiyə isə üçüncü (93) yeri tutub.

Xatırladaq ki, bu yarışda Eldəniz Əzizli (55 kq) ilə Rafiq Hüseynov (82 kq) dünya çempionu olub. Murad Məmmədov (63 kq), Həsrət Cəfərov (67 kq) və Sənan Süleymanov (77 kq) isə gümüş medal qazanıb. Komanda 67 və 77 kq-da olimpiadaya lisenziya əldə edib.