“Qarabağ” klubu və Avropa Futbol Akademiyası arasında əməkdaşlıq müqaviləsi imzalanıb

“Qarabağ” klubu ilə Avropa Futbol Akademiyası (EFA) arasında əməkdaşlıq barədə müqavilə imzalanıb.

Ağdam təmsilçisindən "Report"a verilən məlumata görə, tədbirdə "Qarabağ"ın baş direktoru Əmrah Çəlikəl, EFA-nın təsisçi-direktoru Vüsal Mustafayev, inzibati işlər üzrə direktor Murat Karaman və baş meneceri Kamran Bayramov iştirak ediblər.

Ə.Çəlikəl əməkdaşlığın perspektivlərindən danışıb: “Çox yaxşı haldır ki, Azərbaycanda uşaq futboluna diqqət ayıran, bu istiqamətdə püxtələşən belə bir akademiya fəaliyyət göstərir. Sözügedən akademiyanın iş prinsipləri və futbola yanaşması ilə yaxından tanış olduq və perspektiv vəd edən müqaviləyə imza atdıq. EFA-nın bizimlə əməkdaşlıq etmək istəyi “Qarabağ”a verilən dəyəri göstərir. İnanıram ki, “Qarabağ”la anlaşma EFA-nın fəaliyyətinə əlavə stimul verəcək və yeni futbolçuların akademiyaya cəlb olunmasında, onların inkişafında müsbət rol oynayacaq. Bu, Azərbaycan futbolu və “Qarabağ” üçün yeni gənc futbolçuların yetişməsi mənasında bir şans, üstünlükdür”.

V.Mustafayev müqavilə barədə fikirlərini açıqlayıb: “Qarabağ” kimi böyük bir klubla müqavilə bağladığımız üçün çox şadıq. “Qarabağ” illərdir nəinki Azərbaycanda, Avropa arenalarında sözünü layiqincə deyən, adından söz etdirən komandadır. “Qarabağ”la müqavilə imzalamaq bizim üçün çox önəmli, qürurvericidir. Bu əməkdaşlıq sayəsində yerli futbolçularımız böyük arenalarda oynamaq şansı əldə edəcəklər, “Qarabağ”ın seçimi isə böyüyəcəklər və gənclər arasında rəqabət artacaq”.

Qeyd edək ki, əsas məqsədi ölkədə uşaq futbolunu inkişaf etdirmək və yüksək səviyyəli futbolçular yetişdirmək olan EFA 2017-cl ildə yaradılıb. Akademiyada 9-17 yaş aralığında futbolçulardan ibarət komandaların tərkibində 300-ə yaxın yeniyetmə futbolun sirlərinə yiyələnir. Sözügüdən komandalar AFFA-nın təşkil etdiyi aşağı yaş qrupları üzrə turnirlərdə mübarizə aparır. Hazırda EFA-nın yetimələrindən bir neçəsi Avropanın müxtəlif klublarında top qovur. Akademiyanın yetirmələri aşağı yaş qrupları üzrə Azərbaycan yığmalarına da cəlb olunur.

Müqaviləyə əsasən, “Qarabağ” klubu EFA-nın tərkibində fərqlənən, perspektiv vəd edən futbolçuları öz komandalarına qatmaq hüququna malikdir.