“Sumqayıt” rəsmisi: “AFFA və PFL-in razılığından sonra yeni stadionda oyun keçirə biləcəyik”

“Yarışlara məsul qurumlar AFFA və Peşəkar Futbol Liqası razılıq verdikdən sonra komandamız yeni stadionda oyun keçirə biləcək”.

Bunu “Report”a açıqlamasında “Sumqayıt”ın mətbuat xidmətinin rəhbəri Zaur Xudiyev komandanın Mehdi Hüseynzadə adına şəhər stadionuna nə vaxt köçəcəyi ilə bağlı məsələyə münasibət bildirərkən deyib.

Klub rəsmisi bildirib ki, arena ilk növbədə “gənclik şəhəri” təmsilçisinin sərəncamına verilməlidir: “Stadion Sumqayıt Şəhər İcra Hakimiyyəti tərəfindən tikilib, qazon, oturacaqlar, “skay-boks” hazırdır. Ancaq oyun keçirmək üçün təkcə bunlar kifayət deyil. Əvvəla, stadion “Sumqayıt”ın sərəncamına verilməlidir. Yəqin ki, Sumqayıt Şəhər İcra Hakimiyyəti ilə klub arasında anlaşma olacaq”.

Z.Xudiyevin sözlərinə görə, arenada görüləcək bəzi işlər var: “Arena əvvəlcə bizə verilməli, həmçinin bir sıra çatışmazlıqlar aradan qaldırılmalıdır. Bura işıqlandırma, tablo, internet xətti, jurnalistlər, qonaqlar üçün yer, paltardəyişmə otaqları və sair aiddir. Bu xırda məsələlər həll olunduqdan sonra AFFA və PFL-in nümayəndələri tərəfindən baxış keçiriləcək”.

Qeyd edək ki, Azərbaycan Prezidenti İlham Əliyev oktyabrın 23-də Mehdi Hüseynzadə adına Sumqayıt şəhər stadionunda yenidənqurmadan sonra yaradılan şəraitlə tanış olub. Tamaşaçı tutumu 9502 nəfər olan stadionda 545 nəfərlik VİP və KİV tribunası yaradılıb.