“Cəlilabad” basketbol klubu “Xəzri” ilə oyuna ciddi itkilərlə çıxacaq

“Cəlilabad” komandası Azərbaycan Basketbol Liqasının XII turunda “Xəzri” ilə oyuna ciddi itkilərlə çıxacaq.

“Report” xəbər verir ki, bu barədə klubun baş məşqçisi Şəhriyar Əsgərov məlumat verib.

O bildirib ki, Kobi Tomas və kapitan Zaur Paşayev bu qarşılaşmanı buraxacaqlar: “Bəzi itkilərin olması bizi məyus edir. Kobi Tomas yenə oynamayacaq, onun zədəsi davam edir. Camani Pirsin matçda iştirakı sual altındadır. Ən ciddi itkimiz Zaur Paşayevdir. “Neftçi”yə qarşı ötən turun matçında aldığı zədə kapitanımızın oynamasına imkan vermir. Zaurun zədələnməsi bizi ən çox narahat edən məqamdır”.

İtkilərin fonunda Seyidhüseyn Eynullayev zədəsini sağaldıb: “Bizi sevindirən yeganə amil Seyidhüseyn Eynullayevin hazır olmasıdır. Seyidhüseyn meydançaya çıxmaq üçün özünü hazır hiss edir. Bütün itkilərə baxmayaraq, bu qarşılaşmada azarkeşlərimizi sevindirməyə çalışacağıq”.

Şəhriyar Əsgərov “Xəzri”nin güclü heyətə və yaxşı baş məşqçiyə malik olduğunu bildirib: “Çox güclü rəqibə qarşı oynayacağıq. “Xəzri” liderlər qrupunda qərarlaşıb və çempionluğa əsas namizədlərdən biri sayılır. İlk dövrədə Cəlilabadda onlara məğlub olmuşduq. “Xəzri”nin geniş heyəti var. Həmçinin məşqçiləri Murad Dikmən çox təcrübəlidir. Düzdür, bəzən çox emosional olur, ancaq ümumi baxsaq, oyunu çox yaxşı hiss edən və anlayan məşqçidir. Lakin biz rəqibdən çəkinmirik”.

Qeyd edək ki, bu gün keçiriləcək “Xəzri” – “Cəlilabad” oyunu saat 16:00-da başlayacaq. Hazırda “Xəzri” 20 xalla üçüncü, “Cəlilabad” isə 15 xalla altıncı yerdə qərarlaşıb.