"Qəbələ"nin türkiyəli məşqçisi: "Təklif gələndə tərəddüd etmədən razılaşdım"

"Təklif gələndə tərəddüd etmədən razılaşdım".

Bunu "QELEBE.AZ"a açıqlamasında "Qəbələ"yə məşqçi təyin edilmiş Çağlar Volqa deyib.

Türkiyəli mütəxəssis əvvəllər Azərbaycanda və "qırmızı-qaralar"da işləyən dostlarından xoş sözlər eşitdiyini bildirib: "Ötən il ölkə kubokunu qazanmış, dost və qardaş ölkəmiz Azərbaycanın dəyərli "Qəbələ" klubu ilə müqavilə imzaladığım üçün məmnunam, fəxr edirəm. Azərbaycanda çalışmış Fatih Kavlakın vasitəsi ilə əlaqə yaratdıq. Açığı, mənə də maraqlı idi".

Çağlar Volqa Türkiyə ilə Azərbaycanın dost və qardaş ölkə olduğunu söyləyib: "Burada mənə göstərilən hörmətdən, diqqətdən çox məmnunam. Mənə bu fürsəti yaratdıqları üçün klub prezidenti Fariz Nəcəfova, idman direktoru Səbuhi Səfiyarlıya təşəkkürümü bildirirəm. Ümid edirəm ki, hər şey yaxşı olacaq. Azərbaycanlı qardaşlarımıza sevgi və ehtiramımı bildirirəm".

Qeyd edək ki, Çağlar Volqa karyerası ərzində “Marmaris Bələdiyyəsi”, “Göztəpə”, “Altınordu”, “Altay”, “Ərzincanspor”, “Konyaspor” klublarında köməkçi məşqçi kimi çalışıb. Mütəxəssis “Osmanlıspor”da əvvəl videoanalitik, sonradan köməkçi məşqçi, “Ərzurumspor” və “Samsunspor”da fiziki hazırlıq üzrə çalışdırıcı kimi işləyib.