AFFA UEFA-nın təyin edəcəyi başqa federasiya ilə təcrübə mübadiləsi apara bilər

AFFA UEFA-nın təyin edəcəyi başqa federasiyası ilə təcrübə mübadiləsi apara bilər.

Bu barədə "QELEBE.AZ"a milli assosiasiyanın Klubların Lisenziyalaşdırılması Departamentinin direktoru Elçin Məmmədov açıqlamasında bildirib.

Niderlandın paytaxtı Amsterdamda UEFA-nın üzv assosiasiya nümayəndələrinin iştirakı ilə “UEFA-nın Klubların Lisenziyalaşdırılması və Maliyyə Dayanıqlığı” mövzusunda seminar haqqında danışan qurum rəsmisi burada 19 ölkədən nümayəndələrin iştirak etdiyini söyləyib: "İki gün ərzində bir neçə mövzunu müzakirə etmişik. İlk olaraq Niderlandda Lisenziyalaşdırma sistemi ilə tanış olduq, prezentasiyanı dinlədik. Növbəti mövsümdən etibarən gözlənilən dəyişikliklər barədə müzakirələr aparıldı. UEFA klubların maliyyə vəziyyəti ilə bağlı hesabat təqdim edib. Seminarda da bununla bağlı məlumatlar verildi. Lisenziar və lisenziya iddiaçısı arasında kommunikasiyalar haqqında fikirlər səsləndirildi. Şotlandiya nümayəndəsi öz prezentasiyanı təqdim etdi və bunu müzakirəyə çıxardıq".

Elçin Məmmədov UEFA-nın yeni təcrübə mübadiləsi proqramı haqqında da məlumat verib: "Yaxın aylarda milli assosiasiyalar klubların lisenziyalaşdırılması mövzusunda bir-biri ilə təcrübə mübadiləsinin aparılması ilə bağlı UEFA-ya müraciət edə biləcək. Lisenziarların maraqları, ölçüləri və cari vəziyyətini təhlil edərək, UEFA bir yerdə çalışacaq federasiyaları təyin edəcək. Seminarda sonuncu mövzu lisenziar olan milli assosiasiyaların sertifikasiyası olub. Bildiyiniz kimi, hər il bizi müstəqil auditor yoxlayır. Bununla bağlı müzakirələr aparıldı, ötən mövsümdə sertifikat ala bilməyən federasiyalardakı çatışmazlıqlar barədə danışıldı".