“Qarabağ” dəqiq zərbə sayında 900 klub arasında 39-cu yerdədir

2023/2024 mövsümündə ölkə çempionatlarında "çərçivə"yə ən çox zərbə vuran klubların adları açıqlanıb.

“Report”un Beynəlxalq İdman Araşdırmaları Mərkəzinə (CİES) istinadən məlumatına görə, 54 liqanın 900 klubu ilə bağlı aparılan araşdırma nəticəsində Azərbaycan təmsilçilərinin mövqeləri də müəyyənləşib.

Bu baxımdan ən yaxşı göstərici “Qarabağ”a məxsusdur. Ağdam təmsilçisi hər matçda orta hesabla 5,81 dəqiq zərbə ilə yadda qalıb. Qurban Qurbanovun kollektivi bu baxımdan dünyanın 39-cu komandasıdır.

Azərbaycan Premyer Liqasının iştirakçıları arasında “Qarabağ”dan sonra ikinci sırada “Turan Tovuz” qərarlaşıb. Bölgə klubu orta hesabla hər görüşdə "çərçivə"yə 4,64 zərbə vurub.

Premyer Liqada klublarının göstəriciləri:

1. “Qarabağ” - 5,81

2. “Turan Tovuz” - 4,64

3. “Sabah” - 3,81

4. “Qəbələ” - 3,73

5. “Səbail” - 3,73

6. “Araz-Naxçıvan” - 3,57

7. “Neftçi” - 3,50

8. “Kəpəz” - 3,38

9. “Zirə” - 2,77

10. “Sumqayıt” - 2,73

Qeyd edək ki, dünya reytinqinə Niderland klubu PSV başçılıq edir. Eyndhoven təmsilçisi orta hesabla hər qarşılaşmada rəqib qapıçını 8,92 “seyv”ə vadar edib.