Azərbaycan güləş millisi Paris-2024 Yay Olimpiya Oyunlarına daha bir lisenziya qazanıb - YENİLƏNİB-3

Azərbaycanın sərbəst güləş millisi Paris-2024 Yay Olimpiya Oyunlarına daha bir lisenziya qazanıb.

“Report”un məlumatına görə, Bakıda keçirilən Avropa Olimpiya Təsnifat turnirində bu dəfə Osman Nurmaqomedov bunu reallaşdırıb.

86 kq çəki dərəcəsində çıxış edən 25 yaşlı pəhləvan Avropa çempionu olan ukraynalı Vasili Mixaylonu yarımfinalda 4:1 hesabı ilə məğlub edib.

Qeyd edək ki, bu gün Əliabbas Rzazadə (57 kq), Hacı Əliyev (65 kq) və Turan Bayramov (74 kq) da olimpiadaya lisenziya qazanıblar.

Azərbaycanın sərbəst güləşçisi Osman Nurmaqomedov Bakıda keçirilən Avropa Olimpiya Təsnifat turnirində üçüncü görüşünə çıxıb.

“Report” xəbər verir ki, 86 kq çəki dərəcəsində yer alan idmançı 1/4 final mərhələsində Bolqarıstan təmsilçisi Maqomed Ramazanovla qarşılaşıb.

Rəqibinə 6:2 hesabı ilə qalib gələn Nurmaqomedov Paris-2024 Yay Olimpiya Oyunlarına lisenziya şansını davam etdirib. O, yarımfinalda Vasili Mixaylovla (Ukrayna) qarşılaşacaq.

Qeyd edək ki, daha əvvəl Əliabbas Rzazadə (57 kq), Hacı Əliyev (65 kq), Turan Bayramov (74 kq) və Georgi Meşvildişvili (125 kq) də yarımfinala adlayıblar.

Azərbaycanın sərbəst güləşçisi Osman Nurmaqomedov Bakıda keçirilən Avropa Olimpiya Təsnifat turnirində ikinci görüşünə çıxıb.

“Report” xəbər verir ki, 86 kq çəki dərəcəsində yer alan idmançı 1/8 final mərhələsində isveçrəli Samuel Şerrerlə üz-üzə gəlib.

Rəqibinə 5:0 hesabı ilə qalib gələn Nurmaqomedov 1/4 finala yüksəlib. Təmsilçimiz növbəti görüşündə Maqomed Ramazanovla (Bolqarıstan) üz-üzə gələcək.

Qeyd edək ki, daha əvvəl Əliabbas Rzazadə (57 kq), Hacı Əliyev (65 kq) və Turan Bayramov (74 kq) 1/4 finala adlayıblar.

Azərbaycanın sərbəst güləşçisi Osman Nurmaqomedov Bakıda keçirilən Avropa Olimpiya Təsnifat turnirində mübarizəyə başlayıb.

“Report” xəbər verir ki, 86 kq çəki dərəcəsində yer alan idmançı təsnifat mərhələsində litvalı Domantas Pavluçenko ilə üz-üzə gəlib.

Rəqibinə 9:0 hesabı ilə qalib gələn Nurmaqomedov 1/8 finala yüksəlib. Onun bu raunddakı rəqibi İsveçrə idmançısı Samuel Şerrer olacaq.

Qeyd edək ki, Avropa Olimpiya Təsnifat turnirinin ilk iki günündə Azərbaycanın yunan-Roma və qadın güləşçiləri uğursuz çıxış ediblər.