Azərbaycan millisinin baş məşqçisi: İnsanlar olimpiadaya vəsiqə qazana biləcəyimizi düşünmürdülər
https://mail.qalaba.az//uploads/photo/azerbaycan-millisinin-bash-meshqchisi-insanlar-olimpiadaya-vesiqe-qazana-bileceyimizi-dushunmurduler.webp
İnsanların çoxu bizim bunu edə biləcəyimizi düşünmürdülər.
Bunu "Report"a açıqlamasında Azərbaycanın basketbol üzrə 3x3 qadın millisinin baş məşqçisi Ratomir Deliç komandanın Paris-2024 Yay Olimpiya Oyunlarına vəsiqə qazanması barədə danışarkən deyib.
Mütəxəssis Honqkonqda təşkil olunan Olimpiya Təsnifat turnirindəki inamlı çıxışa görə oyunçulara təşəkkür edib: "Qızlar məni çox qürurlandırdılar. Matçlarda sonadək mübarizə apardılar. Həqiqətən də olimpiadaya lisenziya əldə etməyə layiqik. Hamıya bu qalibiyyəti çox istədiyimizi göstərdik".
Baş məşqçi komandaya əvvəldən inandığını sözlərinə əlavə edib: "Qızlarımız böyük nailiyyətlər əldə edə biləcəyimizi göstərdilər. Şadam ki, Azərbaycan üçün ilk dəfə bunu bacardıq və artıq ölkənin idman tarixinin bir hissəsiyik".
Qeyd edək ki, millimiz turnirin finalında Polşaya 18:17 hesabı ilə qalib gələrək Paris-2024 Yay Olimpiya Oyunlarına lisenziya qazanıb. Azərbaycan ilk dəfə komanda idman növündə olimpiadada təmsil olunacaq.
