Azərbaycanın dünya çempionu: Olimpiadada fəxri kürsüdə yer almaq üçün əlimdən gələni edəcəyəm

Olimpiadada fəxri kürsüdə yer almaq üçün əlimdən gələni edəcəyəm.

"Report"un məlumatına görə, bunu Birləşmiş Ərəb Əmirliklərinin paytaxtı Əbu-Dabidə keçirilən dünya çempionatının qalibi olan Azərbaycan cüdoçusu Zelim Kotsoyev Heydər Əliyev Beynəlxalq Hava Limanında qarşılanma mərasimi zamanı jurnalistlərə açıqlamasında deyib.

100 kq çəki dərəcəsində mübarizə aparan idmançı Azərbaycan üçün qızıl medal qazandığına görə çox şad olduğunu bildirib: "Ötən il Avropa çempionatının qalibi olmuşdum. Bu dəfə mundialda bayrağımızın dalğalandırılmasına və himnimizin səsləndirilməsinə nail oldum. 2016-cı ildən Azərbaycandayam. Ölkənin bayrağını beynəlxalq arenalarda dalğalandırmaq üçün əlimdən gələni edirəm. Olimpiadada da fəxri kürsüdə yer almaq üçün əlimdən gələni edəcəyəm".

"Emosiyalara gəlincə, sözün düzü, bir qədər inanılmazdır. Amma mən çox xoşbəxtəm. Həmişə dünya çempionu olmaq arzusu ilə yaşamışam. Mundialda iki dəfə üçüncü yeri tutmuşdum. Şəxsi məşqçim Elxan Məmmədov bu turnirə kimi Azərbaycanın yeganə dünya çempionu idi. O, həmişə mənə deyirdi ki, sən də bunu bacara bilərsən, məşqlərə ciddi yanaş, rejimə əməl et. Qızıl medal qazanandan sonra yanıma gəldi və "gördün, sən bunu bacardın" dedi. O, mənə çox motivasiya verirdi. O, mənə Birinci vitse-prezident Mehriban Əliyevanın instaqramdakı təbrik paylaşımını da göstərdi".