Bakıda Beynəlxalq Voleybol Federasiyasının seminarı başa çatıb

Bakıda məşqçilər üçün keçirilən Beynəlxalq Voleybol Federasiyasının (FIVB) Level-1 seminarı başa çatıb.

"QELEBE.AZ"un məlumatına görə, tədbir FIVB-nin dəstəyi və Azərbaycan Voleybol Federasiyasının (AVF) təşkilatçılığı ilə baş tutub.

Seminarda Bakı və bölgələrimizdən olan məşqçilərlə yanaşı, Türkiyə, Avstraliya, İran, Hindistan və Belarusdan ümumilikdə 40-a yaxın mütəxəssis iştirak edib. Seminara FIVB-nin məşqçi-instruktoru Cengiz Akarçeşme və yeniyetmə, gənc oğlanlardan ibarət milli komandaların rəhbəri Cahangir Seyed Abbasi rəhbərlik ediblər.

Tədbir nəzəriyyə və təcrübədən ibarət olub. Mayın 23-də iştirakçılar praktiki yoxlamadan keçiblər. Burada lazımi bal toplayan mütəxəssislər nəzəri imtahanda iştirak hüququ qazanıblar. Mayın 24-də son imtahanın ardınca yüksək nəticə göstərmiş iştirakçılar müəyyənləşib. 38 nəfərdən 35-i FIVB-nin Level-1 dərəcəli beynəlxalq sertifikatına layiq görülüb. Digərlərinə isə iştirakçı sertifikatı verilib.

İmtahanlardan sonra bağlanış mərasimi baş tutub. Gənclər və İdman Nazirliyinin Voleybol Mərkəzində təşkil olunan tədbirdə AVF-nin baş katibi Faiq Orucov çıxış edərək iştirakçıları salamlayıb, imtahanları uğurla keçən və FIVB Level-1 sertifikatı alan məşqçiləri təbrik edib.

F.Orucov bu cür seminarların həm də yerli məşqçilər üçün böyük təcrübə olduğunu diqqətə çatdırıb. Federasiya rəsmisi sertifikat ala bilməyən iştirakçılara öz üzərilərində daha yaxşı çalışmaqlarını tövsiyə edib, onların növbəti seminarlarda uğurlu nəticə əldə edəcəklərinə əminliyini bildirib.

Daha sonra çıxış edən Cengiz Akarçeşme və Cahangir Seyed Abbasi AVF-nin beynəlxalq seminarlara ev sahibi etməsini yerli məşqçilərin təcrübələrinin artırılması üçün yaxşı fürsət olduğunu bildiriblər, yüksək səviyyədə təşkilatçılıq üçün federasiya rəhbərliyinə təşəkkür ediblər.

Sonda Level-1 sertifikatı alan iştirakçılara diplomlar təqdim olunub və xatirə şəkli çəkilib.

Qeyd edək ki, bu Azərbaycanda keçirilən dördüncü FIVB Level-1 seminarıdır.