"Zirə"nin kapitanı: Finalda "Qarabağ"dan geri qaldığımızı düşünmürəm

Finalda "Qarabağ"dan geri qaldığımızı düşünmürəm. Sadəcə, bu gün şans onların tərəfində idi. Növbəti qarşılaşmalara hazırlaşacağıq.

Bunu "Report"a açıqlamasında "Zirə"nin futbolçusu Qismət Alıyev "Qarabağ"a 1:2 hesabı ilə uduzduqları Azərbaycan Kubokunun final matçından sonra deyib.

27 yaşlı yarımmüdafiəçi yaxşı və maraqlı oyun alındığını bildirib: "Bəlkə də məğlubiyyətə layiq deyildik. İkinci hissədə qol imkanlarımız oldu, amma yararlana bilmədik. Bizi UEFA Avropa Liqasının oyunları gözləyir. Çalışıb bu matçlara hazırlaşacağıq".

Kapitan səhvlərinin üzərində işləməli olduqlarını söyləyib: "Rəqibin standart vəziyyətdən fərqlənə biləcəyini fikirləşmirdik. Əvvəlki oyunlarda bu baxımdan elə də təhlükəli deyildilər. Bu dəfə onlarda alındı. Bəlkə də həmin epizodda bir az da diqqətli olmalıydıq".

Q.Alıyev ikinci hissədə çox yaxşı çıxış etdiklərini deyib: "Qarabağ"a hansısa boşluq verdikdə istifadə edirlər. Birinci hissənin sonlarında yüngül səhvimiz oldu. Bundan da maksimum yararlandılar. İkinci yarıda komandamız çox yaxşı təsir bağışladı. Sadəcə, sonluğu gətirə bilmədik. Düşünürəm ki, belə oyunla daha yaxşı nəticələr əldə edə bilərik".