Qusarda jurnalistlər arasında voleybol üzrə Zəfər Kubokuna start verilib

Qusar Olimpiya İdman Kompleksində ümummilli lider Heydər Əliyevin anadan olmasının 101-ci ildönümünə həsr olunmuş jurnalistlər arasında voleybol üzrə Zəfər Kubokuna start verilib.

"Report" xəbər verir ki, İdman Araşdırmalar Mərkəzi və Quba-Xaçmaz Regional Gənclər və İdman İdarəsinin təşkilatçılığı, "Sumqayıt" Voleybol Klubunun dəstəyi ilə gerçəkləşən yarışa 6 komanda qatılıb.

Onlar işğaldan azad olunmuş ərazilərin - Şuşa, Laçın, Kəlbəcər, Füzuli, Zəngilan və Ağdərənin adlarını daşıyırlar.

Açılış mərasimində Qusar rayon icra hakimiyyətinin başçısı Sahir Məmmədxanov, Quba-Xaçmaz Regional Gənclər və İdman İdarəsinin rəisi Nəcəf Novruzov, Qusar Olimpiya İdman Kompleksinin direktoru Elşən Məmmədov və "Sumqayıt" Voleybol Klubunun direktoru Azər Kərimov iştirak ediblər.

S.Məmmədxanov çıxışında ümummilli lider Heydər Əliyev tərəfindən mediaya böyük diqqətin göstərildiyini, məhz onun hakimiyyəti dövründə senzuranın aradan qaldırıldığını xatırladıb. O, hazırkı dövlət başçısı İlham Əliyevin rəhbərliyi altında da azad mətbuatın uğurla fəaliyyət göstərdiyini vurğulayıb.

Jurnalistləri 22 iyul - Milli Mətbuat günü münasibətilə təbrik edən icra başçısı onlara fəaliyyətlərində uğurlar, yeni-yeni nailiyyətlər arzulayıb.

Daha sonra kompleksin rəhbəri E.Məmmədov yarış təşkilatçıları adından S.Məmmədxanova arxasında adı və Qusarın avtomobil seriyası olan 38 yazılmış forma təqdim edib.

N.Novruzov isə çıxışında idman jurnalistləri arasında voleybol turnirinin ardıcıl dördüncü ildir keçirildiyini diqqətə çatdıraraq, təşkilatçılığa görə kompleks rəhbərliyinə təşəkkürünü bildirib.

Daha sonra şəhid övladlarına və müharibə veteranı olan jurnalistlərdən ibarət "Ağdərə" komandasına hədiyyələr təqdim olunub.

Ulu öndər Heydər Əliyevin və Azərbaycanın ərazi bütövlüyü uğrunda döyüşlərdə canlarından keçmiş şəhidlərin xatirəsi bir dəqiqəlik sükutla yad olunub, Azərbaycan Respublikasının Dövlət Himni səsləndirilib.

Bədii hissədə isə "Lezginka" qrupunun ifasında rəqs təqdim olunub.

Daha sonra yarışa start verilib.

Püşkə əsasən, A qrupunda Kəlbəcər, Zəngilan, Füzuli, B qrupunda isə Şuşa, Ağdərə və Laçın komandaları yer alıb.

Bu gün qrup oyunları keçirilib. İyulun 21-də isə yarımfinal, üçüncü yer uğrunda və final görüşləri təşkil olunacaq.

İlk 3 yerin sahiblərinə müvafiq olaraq, qızıl, gümüş və bürünc medallar, qalib komandaya əlavə olaraq, Zəfər Kuboku təqdim olunacaq.