ARAF ötən ilin yekunları ilə bağlı tədbir keçirib, yeni baş katib bəlli olub

Azərbaycan Respublikası Atçılıq Federasiyası (ARAF) 2024-cü ilin yekunlarına həsr olunmuş tədbir keçirib.

Dövlət Sərhəd Xidmətindən "Report"a verilən məlumata görə, tədbirdə gənclər və idman naziri Fərid Qayıbov, federasiyanın prezidenti Elçin Quliyev, İdarə Heyətinin üzvləri və dəvət olunmuş qonaqlar iştirak ediblər.

Gənc nəsilin sağlam ruhda yetişdirilməsi üçün Prezident İlham Əliyev və Birinci vitse-prezident Mehriban Əliyevanın ölkəmizdə idmanın inkişafına göstərdiyi diqqət və qayğı Elçin Quliyevin açılış nitqində xüsusi vurğulanıb.

Federasiya prezidenti milli idman irsini inkişaf etdirmək, beynəlxalq səviyyədə uğur qazanmaq və atçılıq idmanını ölkədə daha geniş yaymaq üçün səy göstəriləcəyinə əminlik ifadə edib.

Tədbirin davamında federasiyanın baş katibi Bəhruz Nəbiyev tərəfindən 2024-cü ilin ən yaxşılarının mükafatlandırılma mərasimi təşkil olunub.

Mükafatlandırma mərasimindən sonra Fərid Qayıbov çıxış edərək ARAF-nin 2024-cü il ərzində əldə etdiyi uğurları yüksək qiymətləndirib, atçılıq sahəsində görülən işlərin Azərbaycanın milli idman irsini inkişaf etdirməkdə mühüm rol oynadığını vurğulayaraq federasiyanın beynəlxalq səviyyədə uğur qazanmaq və ölkəmizi layiqincə təmsil etmək istiqamətində həyata keçirdiyi təşəbbüslərin əhəmiyyətindən danışıb.

Tədbirin ikinci hissəsində keçirilən iclasda 2025-ci il üçün federasiya qarşısına qoyulan hədəf və məqsədlər açıqlanıb, növbəti ilin planları müzakirə olunmuş və keçiriləcək tədbirlər, eləcə də yarışlar haqqında ətraflı məlumat təqdim edilib.

Tədbir iştirakçıları 2024-cü ilin uğurlarını qeyd edərək, növbəti ildə yeni zirvələrə çatmaq əzmini ifadə ediblər.

Hazırkı baş katib Bəhruz Nəbiyev Beynəlxalq Çövkən Federasiyasına prezident seçildiyinə görə, ARAF-nin yeni baş katibi vəzifəsinə Emil Seyidovun namizədliyi irəli sürülüb. Səsvermənin nəticələrinə əsasən, Emil Seyidov ARAF-nin yeni baş katibi seçilib.