Rövlan Muradov: "De Byazinin mənə şans verməməsi ruh düşkünlüyü yaratmır"

"Canni De Byazinin mənə şans verməməsi ruh düşkünlüyü yaratmır".

Bunu "Report"a açıqlamasında "Qəbələ" klubunda çıxış edən Azərbaycan millisinin üzvü Rövlan Muradov Moldova və Şimali Makedoniya yığmalarına qarşı yoldaşlıq oyunlarında meydana çıxmaması ilə bağlı danışarkən deyib.

Yığmada debüt etməyən 24 yaşlı yarımmüdafiəçi baş məşqçinin qərarına hörmətlə yanaşdığını bildirib: "Ümid edirəm ki, bu, daha artıq çalışmağıma, meydanda qollar vurmağıma və məhsuldar ötürmələr etməyimə gətirib çıxaracaq. Özümü göstərdikdən sonra yenidən dəvət alacağıma inanıram".

Muradov daha əvvəl İrlandiya və Serbiyaya qarşı DÇ-2022-nin seçmə matçlarına da dəvət aldığını, lakin meydana çıxmadığını xatırladıb: "Baş məşqçi nə vaxt lazım bilsə, mən hər zaman hazıram. Şanşımı gözləyirəm ki, maksimum hazırlıqlı şəkildə özümü göstərə bilim".

Oyunçu Azərbaycan Kubokunun 1/4 finalında "Qarabağ"a rəqib olmaları və çempionatdakı durumları haqqında da danışıb: "Rəqibin gücü hər kəsə məlumdur. Cütün taleyi iki oyunun nəticəsinə əsasən bəlli olacaq. Əlimizdən gələni edərək qələbə qazanmağa çalışacağıq. Azərbaycan Premyer Liqasında isə medalçılar sırasına düşəcəyimizə ümid edirəm. Yaxşı kollektivimiz var. İnanıram ki, çempionatın sonunda avrokuboklara vəsiqə qazanacağıq".

Qeyd edək ki, Azərbaycan yığması Moldovanı 2:1, Şimali Makedoniya isə 3:1 hesabı ilə məğlub edib.