Monteneqroda qızıl medal qazanan Zidan Hümbətov: "Qazaxıstan çempionuna qarşı ilk döyüşüm daha çətin oldu"

İlk döyüş daha çətin oldu. Çünki Qazaxıstan çempionu ilə mübarizə aparırdım.

Bunu “QELEBE.AZ”a açıqlamasında Azərbaycanın gənc boksçusu Zidan Hümbətov Monteneqronun Budva şəhərində keçirilən “Adriatik incisi” beynəlxalq turnirinin qalibi olması ilə bağlı danışarkən deyib.

Dünya Kuboku statuslu turnirdə 54 kq çəkidə mübarizə aparan idmançı keçirdiyi görüşlərdən danışıb:

“Yarış mənim üçün yaxşı keçdi. İlk döyüşdə Qazaxıstan idmançısı ilə qarşılaşdım və qələbə qazandım. İkinci döyüş qırğızıstanlı boksçuya qarşı idi. Ona nokdaunla qalib gəldim. Yarımfinalda və finalda da rəqiblərim qazaxıstanlı boksçular idi. Yarımfinalda 5:0, finalda isə 4:1 hesablı qələbə qazandım. İlk döyüş daha çətin oldu. Çünki Qazaxıstan çempionu ilə mübarizə aparırdım. Ümumilikdə çox güclü yarış idi”.

Qeyd edək ki, Azərbaycan boksçuları “Adriatik incisi” turnirində ümumilikdə 4 medal qazanıblar. Zidan Hümbətov (54 kq) qızıl, Banuçiçək Nəsirli (48 kq), Özləm Həsənova (66 kq) və İlkanə Əhmədova (+81 kq) isə bürünc medal əldə edib.