"Şamaxı" bir neçə azyaşlı futbolçunu vuran məşqçi ilə bağlı araşdırmalara başlayıb
https://mail.qalaba.az//uploads/photo/shamaxi-bir-neche-azyashli-futbolchunu-vuran-meshqchi-ile-bagli-arashdirmalara-bashlayib.webp
"Şamaxı" klubu U-15 komandasının məşqçisi Vüqar Süleymanovun "Metak"la matçda meydana çıxaraq rəqibin bir neçə azyaşlı futbolçusunu vurması ilə bağlı araşdırmalara başlayıb.
Bu barədə "Report"a bölgə təmsilçisinin mətbuat xidmətinin rəhbəri Yusif Hüseynov məlumat verib.
O, hazırda araşdırmanın davam etdiyini bildirib:
"Oyun iki gün əvvəl olub. AFFA İntizam Komitəsinin qərarı isə dünən çıxıb. Qərar çıxan kimi klub daxilində araşdırmalar başlayıb. Bitdikdən sonra ictimaiyyətə məlumat verə bilərik. Məsələ klub rəhbərliyinin nəzarəti altındadır".
Qeyd edək ki, aprelin 22-də keçirilən görüşdə “Şamaxı”nın adı protokolda qeyd edilməyən, lakin qeydiyyatda olan məşqçisi Vüqar Süleymanov meydana çıxaraq rəqibin bir neçə azyaşlı futbolçusunu yumruqla vurduğuna görə AFFA İntizam Məcəlləsinin 1-ci maddəsinin icazə verdiyi müstəsna hal nəzərə alınaraq 1 il müddətinə futbolla bağlı hər hansı fəaliyyətdən məhrum edilib. Həmçinin klub müstəsna hal olaraq 500 manat cərimələnib. Bununla yanaşı, məşqçinin hərəkətinə görə komanda növbəti ev oyununu azarkeşsiz keçirməli olacaq.
