Azərbaycan millisinin baş məşqçisi: "Önəmli olan komandanı dünya çempionatına tam hazırlamaqdır"

Monteneqroda keçirilən Millətlər Liqası turnirində mübarizə aparan Azərbaycanın minifutbol millisinin əsas hədəfi Bakıda təşkil olunacaq dünya çempionatına qədər tam hazır olmaqdır.

Bunu “Report”a açıqlamasında komandanın baş məşqçisi Elşad Quliyev deyib.

O, Millətlər Liqasının reytinq xalları verən turnir olduğunu vurğulayıb:

“Dünən Bosniya və Herseqovina, daha sonra Türkiyə milliləri ilə oynadıq. Bu gün Monteneqro, sabah isə Qazaxıstanla matçımız olacaq. Millətlər Liqası reytinq xalları verən turnirdir. Milli komandalar oynayır. Bəzən qarışıq heyətlə meydana çıxırlar. Həmçinin biz də eyni şəkildə oynayırıq. Təkcə qələbə haqqında fikirləşmirik. Önəmli olan komandanı Bakıda keçiriləcək dünya çempionatına tam hazırlamaqdır. Yeni oyunçulara daha çox şans veririk. Uduzmaq və ya xal itirmək də bizim üçün böyük əhəmiyyət kəsb etmir”.

Qeyd edək ki, Azərbaycan yığması dünya çempionatının A qrupunda Sloveniya, Mavritaniya və Bəhreynlə mübarizə aparacaq. 32 komandanın iştirak edəcəyi mundial mayın 21-dən iyunun 1-dək Milli Gimnastika Arenasında təşkil olunacaq.