Azərbaycan Üzgüçülük Federasiyasının yeni loqosu, vebsaytı və sosial şəbəkə səhifələri təqdim olunub

Azərbaycan Üzgüçülük Federasiyasının (ASF) yeni loqosu, vebsaytı, sosial şəbəkə səhifələri və idmançı formaları təqdim olunub.

Bu barədə "Report"a qurumun mətbuat xidmətindən məlumat verilib.

Yeni loqo, brendbuk, vebsayt, rəqəmsal platforma akkauntları və milli komanda formaları ilə ASF-nin imici müasir beynəlxalq standartlara daha da uyğunlaşıb.

Yenilənmiş loqotip irəliləyişi, çevikliyi və dözümlüyü simvolizə edən formatda hazırlanıb. Minimalistik və dinamik dizayn tərzi ilə hazırlanan loqo qurumun yanaşmasını əks etdirmək və beynəlxalq səviyyədə tanınmasını artırmaq məqsədi daşıyır.

Milli komandalar üçün hazırlanmış yeni formalar isə həm də funksionallığı ön planda saxlayır. İtaliya şirkəti ilə tərəfdaşlıq çərçivəsində təqdim edilmiş dəst ASF-nin yeni imicinin vacib parçasıdır. Əlavə olaraq üzgüçülük yığmasının üzvlərinə sahəsinin lideri olan Böyük Britaniya şirkətinə məxsus idman geyimləri təqdim edilib.

Bununla yanaşı, ASF rəqəmsal aləmdə də daha geniş şəkildə təmsil olunacaq. Artıq qurumun fəaliyyəti ilə bağlı məlumatlar yalnız “Facebook” və “Instagram”da deyil, həmçinin “LinkedIn”, “TikTok”, “X” və “YouTube” kimi platformalarda da paylaşılacaq. Bu, qurumun daha böyük auditoriya üçün əlçatan olmasını, o cümlədən federasiyanın nəzdində olan idman növlərinin ölkədə daha da populyarlaşmasını hədəfləyir.

Federasiyanın rəsmi www.asf.az vebsaytı da tamamilə yenilənib. İstifadəçiyə rahat interfeys və mobil cihazlara uyğun olmasıyla sayt ziyarətçilərinə ASF-yə aid rəsmi xəbərlər və multimedia materialları ilə sosial şəbəkələrdəkindən daha geniş və ətraflı şəkildə tanışlıq üçün imkanlar yaradacaq. Habelə yerli və beynəlxalq yarışlar haqqında məlumatların, eləcə də ölkədəki bütün hovuzların xəritəsinin yerləşdirilməsi nəzərdə tutulub.

Xatırladaq ki, cari ilin yanvarında keçirilmiş ümumi yığıncaqda Zaur Əliyev ASF-nin prezidenti seçilib. Ötən aylar ərzində strategiya və struktur baxımından yenilənmə prosesinə, beynəlxalq əlaqələrin genişləndirilməsinə start verilib.

Federasiyanın mətbuat xidmətinin yaydığı məlumata görə, 2025-ci ilin sonuna qədər bir sıra digər yeniliklərin və layihələrin də həyata keçirilməsi planlaşdırılır. Məqsəd su idman növlərinin Azərbaycanda kütləviləşdirilməsi və peşəkar idmançıların hazırlıq səviyyəsinin artırılmasından ibarətdir.