"Qalatasaray" Osimheni Türkiyə futbolu üçün rekord məbləğə alıb
https://mail.qalaba.az//uploads/photo/qalatasaray-osimheni-turkiye-futbolu-uchun-rekord-meblege-alib.webp
İstanbulun "Qalatasaray" klubu İtaliyanın "Napoli" klubunun nigeriyalı futbolçusu Viktor Osimhenin transferini başa çatdırıb.
"Report"un xəbərinə görə, bu barədə Türkiyə klubunun mətbuat xidməti məlumat yayıb.
Futbolçu ilə 4 illik müqavilə imzalanıb.
"Qalatasaray" Osimhen üçün 75 milyon avro ödəyib və bu, Türkiyə çempionatının yeni rekordu olub. Əvvəlki rekord 2024-cü ilin yayında İstanbulun “Fənərbaxça” komandasının 19,5 milyon avroya İspaniyanın “Sevilya” klubundan Mərakeş millisinin hücumçusu Yusif Ən-Nəsirini alması ilə müəyyən edilmişdi.
Osimhenin 26 yaşı var, o, ötən mövsümü icarə əsasında "Qalatasaray"da keçirib. Forvard klubda müxtəlif turnirlərdə 41 oyun keçirib, 37 qol vurub və 8 məhsuldar ötürmə edib. 26 qolla futbolçu Türkiyə çempionatının bombardiri olub.
Ötən ay bildirilmişdi ki, "Qalatasaray" Osimhenlə razılığa gəlib. Nigeriyalı hücumçu hər mövsüm üçün 18 milyon avro qazanacaq. Sözləşmədə yer alan bəndə əsasən, Osimhen növbəti 2 il ərzində heç bir İtaliya klubuna transfer oluna bilməz.
