AFFA-nın futboldan uzaqlaşdırdığı hücumçu: “Şikayət versəm, nə dəyişəcək?!”

“Şikayət versəm, nə dəyişəcək? Yenə də görək nə edirik. Yəqin ki, AFFA-ya müraciət edəcəyəm”.

Bunu “QELEBE.AZ”a açıqlamasında danışılmış oyunlara görə futboldan ömürlük uzaqlaşdırılan MOİK-in hücumçusu Fərmayıl Əliyev bildirib.

O qeyd edib ki, istənilən halda, AFFA-nın qərarından şikayət edəcək.

33 yaşlı futbolçu milli assosiasiyanın Apellyasiya Arbitraj Tribunalına apellyasiya şikayəti verməyi düşündüyünü söyləyib.

Oyunçu verilən qərarla bağlı geniş danışmaq istəmədiyini vurğulayıb.

Qeyd edək ki, Fərmayıl Əliyev və komanda yoldaşı Emin Mehtiyev “Səbail”ə 0:4 hesabı ilə uduzduqları Azərbaycan Kubokunun 1/8 final oyununun nəticəsini manipulyasiya etdikləri üçün ömürlük diskvalifikasiya olunublar.