Yüksək Liqa: "Murov" çempionluq, "Neftçi" bürünc medal uğrunda ilk addımı atıb

Kişi voleybolçular arasında Azərbaycan çempionatının final mərhələsinə start verilib.

"QELEBE.AZ"un məlumatına görə, Voleybol Mərkəzində üçüncülük və qızıl medal uğrunda birinci qarşılaşmalar keçirilib.

İlk olaraq meydana Yüksək Liqanın bürünc medalı üçün yarışan "Neftçi" və MOİK klubları çıxıblar. Üç set davam edən görüş nominal meydan sahiblərinin inamlı qələbəsi ilə yekunlaşıb - 3:0 (25:19, 25:18, 26:24).

Daha sonra finalın ilk oyunu keçirilib. "Xarı bülbül" və "Murov" kollektivləri arasında baş tutan görüş isə daha gərgin alınıb. İlk seti Şuşa təmsilçisi qazansa da, növbəti hissələrdə daha yaxşı təsir bağışlayan "Murov" 3:1 (20:25, 25:20, 25:19, 25:17) hesabı ilə qalib gəlib.

Qeyd edək ki, reqlamentə əsasən komandalar üç qələbəyədək mübarizə aparırlar.