Heydər Əliyevin 100 illiyinə həsr olunan beynəlxalq turnirin açılış mərasimi keçirilib

Gənclər və İdman Nazirliyi, habelə Azərbaycan Tennis Federasiyasının (ATF) birgə təşkilatçılığı ilə Ulu Öndər Heydər Əliyevin 100 illiyinə həsr olunan Avropa Tennis Turnirinin açılış mərasimi keçirilib.

"Report"un məlumatına görə, əvvəlcə Ümummilli Lider və Vətən uğrunda canından keçən şəhidlərin ruhu 1 dəqiqəlik sükutla yad edilib. Daha sonra Dövlət Himni səsləndirilib.

Ardınca Fərid Qayıbov və ATF-in prezidenti Oqtay Əsədov, Beynəlxalq Tennis Federasiyasının (ITF) İnkişaf Proqramlarının rəhbəri Vitor Kabral çıxış edərək iştirakçıları salamlayıb və onlara uğurlar arzulayıblar.

Açılış mərasimindən sonra Bakı Tennis Akademiyasının ərazisində salınan padel tennis kortu ilə tanışlıq olub. Ardınca Azərbaycan tennisçisi İlham Baxşəliyev gürcüstanlı rəqibi Nikolos Meparidze ilə qarşılaşıb və hər iki setdə qələbə qazanıb - 6:1; 6:0.

Sayca 12-ci dəfə təşkil olunan yarışda 40-a yaxın ölkədən 300-dən artıq tennisçi mübarizə aparır. Onlar 12,14,16 və 18 yaş kateqoriyasında çıxış edirlər. Yarışa mayın 28-də yekun vurulacaq.