Laurentsiu Regekampf: "Transfer siyahımızda bəzi variantlar var"

"Transfer siyahımızda bəzi variantlar var".

Bunu “Report”a müsahibəsində “Neftçi”nin baş məşqçisi Laurentsiu Regekampf deyib.

Təcrübəli mütəxəssis transfer dönəmində heyəti gücləndirmək istədiklərini bildirib. O, yeni oyunçuların yay təlim-məşq toplanışına qədər düşərgəyə qoşulmalarının tərəfdarıdır: “İlk növbədə əlimizdəki heyəti qorumağa çalışmalıyıq. Bəzi mövqelərə elə futbolçular gətirməliyik ki, onlar bizi daha da gücləndirsinlər. Bu istiqamətdə işlərə başlamışıq. Hər mövqedə hazırlıqlı olmalıyıq”.

48 yaşlı baş məşqçi ölkəsi Rumıniyadan oyunçu gətirməyin çətinliyini etiraf edib: “Azərbaycana Rumıniyadan hansısa oyunçu gətirə biləcəyikmi? Bunu bilmirəm. Mənim əsas məqsədim odur ki, alınan oyunçular məqsədimizə çatmağa kömək etsinlər”.

Regekampf növbəti mövsümdə hədəfə çatmaq üçün heyətin gücləndirilməsinin vacibliyini vurğulayıb: “Yeni transferlər təlim-məşq toplanışında sərəncamımızda olmalıdırlar. Qarşıdakı mövsüm ən birinci məqsədimiz çempion olmaq və Konfrans Liqasında qrup mərhələsinə yüksəlməkdir. Klub rəhbərliyi və Müşahidə Şurası tərəfindən bütün yatırımlar olunur”.

Laurentsiu Regekampfın müsahibəsinin tam versiyasını buradan oxuya bilərsiniz.