Azərbaycan Premyer Liqasında 31 oyunda böyükhesablı nəticə qeydə alınıb

Futbol üzrə Premyer Liqasının 2022/23 mövsümündə 31 oyunda böyükhesablı nəticə qeydə alınıb.

"Report" Peşəkar Futbol Liqasının rəsmi saytına istinadən xəbər verir ki, 16 dəfə meydan sahibləri, 15 dəfə qonaqlar üç və ya daha çox top fərqilə qalib gəliblər.

Ən böyükhesablı qələbə 6 top fərqilə olub və 3 dəfə qeydə alınıb. Bunların birində 7:1, ikisində 6:0 hesabına təsadüf olunub. “Qarabağ” 7-ci turda “Zirə”ni 7:1, 27-ci turda “Sumqayıt”ı 6:0 hesabı ilə üstələyib. Sonuncular “Sabah”dan da 6 cavabsız qol buraxıblar.

Bu görüşlərin üçündə də qonaq komanda qalib gəlib. Öz meydanında ən böyükhesablı qələbə 9-cu turda “Kəpəz”i qəbul edən “Sabah”ın hesabındadır – 5:0

“Qarabağ” hamıdan çox – 10 belə qalibiyyət alıb. “Sabah”ın 8, “Neftçi”nin 7 qələbəsi 3 və ya daha çox top fərqilə olub. “Zirə” 2, “Kəpəz”, “Qəbələ”, “Səbail” və “Turan Tovuz”un hərəyə 1 uğuru var. “Sumqayıt”la “Şamaxi” isə belə qələbə qazanmayıb.

Böyük hesabla uduzmayan komandaların da sayı 2-dir. Bunlar “Qarabağ”la “Sabah”dır. “Sumqayıt” 8, “Səbail” 6, “Kəpəz” 5, “Şamaxı”4 “Neftçi”, “Qəbələ”, “Turan Tovuz” və “Zirə” hərəyə 2 ağır məğlubiyyətlə üzləşib.