Bakıda qızıl medal qazanan üçqat olimpiya çempionu: “Bura mənim üçün düşərlidir”

“Bakı mənim üçün hər dəfə düşərli olur”.

“Report”un məlumatına görə, bunu Bakıda keçirilən dünya çempionatında dairəvi stend atıcılığı üzrə qarışıq komanda növündə qızıl medal qazanan ABŞ təmsilçisi Vinsent Hankok deyib.

Kişilər arasında üçqat olimpiya çempionu olan V.Hankok Azərbaycan paytaxtının onun üçün uğurlu yer olduğunu söyləyib: “Bakıda keçirilən dünya kubokunda da qalib olmuşdum. Burada yenə qızıl medal qazandım. Bakı möhtəşəmdir. Atıcılıq Mərkəzi də çox gözəldir. Uzun illərdir yarışlarda çıxış edirəm. Bura gəldikdə özümü evimdəki kimi hiss edirəm. Mərkəzinizdə çıxış etməkdən çox xoşum gəlir”.

O, ilk atışlar zamanı etdiyi səhvlərdən sonra əsəbi olmadığını bildirib: “Final görüşünün əvvəlində bir-iki atış zamanı hədəfdən yayındım. Buna görə əsəbi deyiləm. Əksinə, çox rahat idim. Xoşbəxtəm ki, Cuel Ostin Smit kimi komanda yoldaşım var. O, məni kompensasiya etdi”.

Cuel Ostin Smit isə Hankokla birlikdə çıxış edən zaman rahat mübarizə apardığını söyləyib: “Biz eyni ştatda yaşayırıq. Uzun müddətdir bir yerdə məşq edirik. Ona görə də anlaşmada heç bir problem yoxdur. Üzərimdə təzyiq hiss etmirəm, çox rahatam. Öz evimizdə yarışırmış kimi davrandım”.

Qeyd edək ki, Bakıda keçirilən atıcılıq üzrə 53-cü dünya çempionatı 2018-ci ildən bəri dünyada bu yarış üzrə baş tutan ən kütləvi idman tədbiridir. Yarışda dünyanın 100-dən artıq ölkəsindən 2000-dək idmançı və nümayəndə iştirak edir.