Azərbaycan Premyer Liqası: Birinci dövrənin oyunlarını stadionlardan ümumilikdə 66 571 tamaşaçı izləyib - STATİSTİKA

Azərbaycan Premyer Liqasında 2023/2024 mövsümünün birinci dövrəsinin oyunlarını stadionlardan ümumilikdə 66 571 tamaşaçı izləyib.

“QELEBE.AZ”un araşdırmasına görə, geridə qalan 9 turun 44 qarşılaşmasında bu sayda azarkeş çempionata maraq göstərib.

Bu isə orta hesabla hər matça təxminən 1513 tamaşaçı deməkdir.

Mövsümün ilk dövrəsində ən böyük maraq VI turda olub. Belə ki, “Zirə”, “Kəpəz”, “Araz-Naxçıvan”, “Turan Tovuz” və “Qarabağ”ın ev oyunlarına ümumilikdə 10 950 nəfər toplaşıb. Ən aşağı göstərici isə II tura təsadüf edib. Dörd görüşə 3500 fanat gəlib. Turun “Sumqayıt” – “Sabah” oyunu isə təxirə salınıb.

Bu mövsüm ən çox azarkeş toplayan komanda “Turan Tovuz”dur. 66 571 fanatdan 13 300-ü tovuzluların payına düşür. İkinci sıradakı “Qarabağ” ev oyunlarına 9690 nəfər toplaya bilib. Maraqlıdır ki, ağdamlılar 6 ev matçı keçiriblərsə, Tovuz təmsilçisi doğma arenasında cəmi 3 görüşə çıxıb. Ən az azarkeş marağı olan komanda “Araz-Naxçıvan”dır. Rəqiblərini Mərdəkandakı “Dalğa Arena”da qəbul edən klubun 5 ev görüşünə ümumilikdə 2400 azarkeş gəlib.

Birinci dövrənin ən diqqət çəkən dueli IX turun “Neftçi” – “Qarabağ” qarşılaşması olub. Qonaqların 2:0 hesabı ilə qalib gəldikləri “Neftçi Arena”dakı görüşü 5400 nəfər tribunalardan izləyib. Bu, hələ ki, ən yüksək göstəricidir. Ən az maraq isə IV turun “Araz-Naxçıvan” – “Sumqayıt” görüşünə olub. 1:1 hesabı ilə başa çatan qarşılaşma zamanı “Dalğa Arena”da 350 nəfər yer alıb.

Ümumiyyətlə, 44 görüşdən 18-də tamaşaçı sayı 1000-ə çatmayıb.