"Qarabağ" reqbi komandası beynəlxalq turnirdə 4-cü yeri tutub

Oktyabrın 28-də Azərbaycanın reqbi üzrə “Qarabağ” klubunun yeniyetmələrdən ibarət komandası Gürcüstanın Lentexi vilayətində “Rugby World Georgia” və Gürcüstan Reqbi Birliyinin təşkil etdiyi beynəlxalq reqbi festivalında iştirak edib.

“QELEBE.AZ” xəbər verir ki, Azərbaycan təmsilçisi qrup mərhələsində “Xaşuri” kollektivini 15:0, “Amaranti”ni 25:0 və “Kobuleti”ni 20:0 hesabı ilə udmaqla maksimal göstərici ilə qrupda birinci yeri tutub. 1/4 final mərhələsində “Lentexi” komandasına 15:0 qalib gələn Şuşa təmsilçisi yarımfinalda “Raşebi”yə 0:5, 3-cü yer uğrunda görüşdə isə Samtredia şəhərindən olan “Feniks” komandasına əlavə olunan vaxtda qızıl xal ilə 5:10 hesabı ilə məğlub olaraq 12 komanda arasında 4-cü yeri tutub. Festivalın ən yaxşı oyunçusu adını “Qarabağ”lı Nuran Novruzlu qazanıb.

Klubun təsisçisi Eldar Kərimov komandasının əldə etdiyi nailiyyəti yüksək dəyərləndirib:

“Azərbaycan reqbisi tarixində belə bir nəticə olmamışdı. Ötən Gürcüstan yarışlarında biz maksimum 2 oyun udub, nəticədə 12 komanda arasında 10-cu yeri tuta bilmişdik. Budəfəki nəticə bizim düz istiqamətdə çalışdığımızı göstərir və növbəti yarışlarda komandamız daha da yaxşı çıxış edəcək. Bir müddət əvvəl klubun prezidenti vəzifəsinə Röyal Süleymanov təyin olunub və bu nəticə həm də onun komandanın hazırlığı üçün yaratdığı şəraitin bəhrəsidir”.

O diqqətə çatdırıb ki, yarımfinalda məğlub olmuş komanda 3-cü yer uğrunda oyuna çıxmaqdan imtina etsə də, eyni zamanda təşkilatçılar 3-cü yeri “Qarabağ”a verməyi qərara gəlsələr də, Azərbaycan təmsilçisi bununla bağlı həm “Feniks” komandasına, həm təşkilatçılara müraciət edərək oyunun baş tutmasını təkidlə xahiş edib: “Nəticədə həmin görüşü məğlub tərk etsək də, zənnimcə, ölkəmizi daha yaxşı tərəfdən təmsil etmiş olduq və bir daha reqbi ruhunu qorumaqla hamının alqışını qazandıq”.