Qurban Qurbanov: “Bu gün hər şey gözəl sonluqla başa çatdı”

“Futbolçuları, azarkeşləri təbrik edirəm. Daha əvvəl bu şans əlimizdən qaçmışdı. Bu gün hər şey gözəl sonluqla başa çatdı”.

“Report”un məlumatına görə, bunu “Qarabağ”ın baş məşqçisi Qurban Qurbanov Bakıda İsveçin "Hakken" komandasına 2:1 hesabı ilə qalib gəldikləri Avropa Liqasının qrup mərhələsinin VI tur oyunundan sonra mətbuat konfransında deyib.

51 yaşlı mütəxəssis bildirib ki, bu cür uğur əldə etmək Azərbaycan futboluna təkan verəcək: “Yaxşı komandaların Bakıya gəlməsi ancaq ölkə futboluna fayda verə bilər”.

Qurbanov 9 il əvvəl də Bakıda eyni uğura çox yaxın olduqlarını söyləyib: “Həmin matç daha yaxşı formalaşmağımıza kömək oldu. Böyümək üçün bunları soyuqqanlı qəbul etməliyik”.

Təcrübəli baş məşqçisi pley-offdakı rəqiblərin güclü olduğunu vurğulayıb: “Həmin qarşılaşmalara ciddi hazırlaşmaq və layiqli mübarizə aparmaq istəyirik”.

Qeyd edək ki, "Qarabağ" tarixində ilk dəfə Avropa Liqasında pley-offa yüksəlib.