Klopp karyerasının sonu barədə danışıb: Uzun müddətdir normal həyat sürmürəm

İngiltərənin "Liverpul" futbol komandasının baş məşqçisi Yurgen Klopp klubdan ayrıldıqdan sonra məşqçilik karyerasını bitirəcəyini etiraf edib.

Bu barədə “Report” “Sports Brief”ə istinadən xəbər verir.

“Hazırda məşqçi kimi karyeramı davam etdirməyi planlaşdırmıram. Bir ildən sonra məndən soruşa bilərsiniz, amma indi yox”, - Klopp deyib.

Alman mütəxəssis 2015-ci ilin payızından İngiltərə "Liverpul"unda çalışır. “Qırmızılar” onun rəhbərliyi altında İngiltərə Premyer Liqası, Çempionlar Liqası, Klublararası Dünya Çempionatı, Liqa Kuboku, İngiltərə Kuboku və UEFA Super Kubokunun qalibi olub. O, cari mövsüm başa çatdıqdan sonra komandanı tərk edəcək.

“Uzun müddətdir normal həyat sürmürəm. Normal həyat sürmək üçün qocalana qədər gözləmək istəmirəm. Bunun necə olduğunu və darıxmayacağımı başa düşmək üçün heç olmasa cəhd etməliyəm” - Klopp qərarını izah edib.

"Liverpul" İngiltərə çempionatının turnir cədvəlində 71 xalla ikinci yerdədir.