Azərbaycan Voleybol Federasiyası hakimlər üçün seminar təşkil edib

Azərbaycan Voleybol Federasiyası (AVF) 2024/2025 mövsümündə keçiriləcək yarışlarda iştirak edəcək hakimlər üçün seminar təşkil edib.

AVF-dən "QELEBE.AZ"a verilən məlumata görə, oktyabrın 20-də Gənclər və İdman Nazirliyinin Voleybol Mərkəzində baş tutan seminara paytaxt və bölgələrdən ümumilikdə 40-a yaxın hakim qatılıb.

Seminar federasiyanın Hakimlər Komissiyasının sədri, beynəlxalq dərəcəli hakim Eldar Zülfüqarov və sədrin müavini, beynəlxalq dərəcəli hakim Zaur Hacıyev tərəfindən keçirilib. Mütəxəssislər iştirakçılara yeni mövsümdə baş tutacaq yarışlar, voleybolda tətbiq edilən yeni qaydalar, həmçinin çelenc sistemi haqqında məlumat veriblər və onları maraqlandıran sualları cavablandırıblar.

Seminarın sonunda hakimlər test imtahanında iştirak ediblər. Komissiya hakimlərin təyinatını testin nəticələrinə uyğun olaraq həyata keçirəcək. Ölkəmizdə keçirilən bütün yarışlara hakimlər AVF-nin Hakimlər Komissiyası tərəfindən təyin olunur.

Qeyd edək ki, AVF hər il hakimlərin bilik və bacarıqlarını artırmaq üçün seminarlar keçirir. Yaxın zamanlarda belə seminarlar yenidən təşkil olunacaq.