“Araz-Naxçıvan”ın futzalçısı üç oyunluq cəzalanmasına münasibət bildirib

“Araz-Naxçıvan”ın futzalçısı Xəzər Ağalızadə Yüksək Liqanın VII turunda “Yasamal Bakı” ilə oyundan sonra AFFA İntizam Komitəsi tərəfindən üç oyunluq cəzalandırılmasına münasibət bildirib.

O, “Report”a açıqlamasında oyun zamanı rəqiblə toqquşduğunu və sonradan hakimlə aralarında anlaşılmazlıq yarandığını deyib.

Futzalçı həmçinin qırmızı vərəqə verilən məqamda rəqiblə bir-birilərini itələdiklərini söyləyib:

“Oyun zamanı rəqib futbolçu ilə toqquşdum. Aqressiv oynayırdılar. Sonra hakimlə aramızda anlaşılmazlıq yarandı. Təhqirə yol verməmişəm. Jest deyəndə də, yəqin ki, oyunçu ilə toqquşmadan sonra etdiyim əl hərəkətlərini nəzərdə tuturlar. Qırmızı vərəqə verilən məqamda rəqiblə bir-birimizi itələdik”.

Qeyd edək ki, X.Ağalızadə Yüksək Liqanın VII turunda keçirilən "Yasamal Bakı" – "Araz-Naxçıvan" matçının 36-cı dəqiqəsində təhqiredici, qeyri-etik ifadələr işlətməsi və ya jestlərdən istifadə səbəbindən birbaşa qırmızı vərəqə ilə meydandan kənarlaşdırılıb. O, daha sonra AFFA İntizam Komitəsi tərəfindən üç oyunluq cəzalandırılıb.