PFL rəsmisi: "50-ci Baş Assambleyada Azərbaycan futbolundakı yeniliklərlə bağlı məlumat verdik"

Burada bir sıra fərdi görüşlərdə iştirak edərək, müxtəlif ölkələrdən gələn nümayəndələrlə fikir mübadiləsi apardıq. Görüşlər zamanı qarşı tərəfi Azərbaycan futbolunda baş verən yeniliklərlə bağlı məlumatlandırdıq.

Bunu "QELEBE.AZ"a açıqlamasında Peşəkar Futbol Liqasının (PFL) texniki-idman direktoru Elgiz Abbasov Almaniyanın Frankfurt şəhərində Avropa Liqalarının (European Leagues) 50-ci Baş Assambleyasında iştirakı ilə bağlı danışarkən deyib.

O, PFL-in 2013-cü ildən Avropa Liqalarının tamhüquqlu üzvü olduğunu xatırladıb:

"Bu müddət ərzində Avropa Liqalarına daxil olan tərəfdaşlarla sıx əlaqədəyik. Bu Liqalarda tətbiq edilən yeniliklərlə bağlı təcrübənin öyrənilməsi daim diqqət mərkəzindədir. Çünki futbolun innovativ inkişafı qarşıya qoyulan əsas hədəflərdən biridir. Biz də çalışırıq ki, Avropa Liqalarının həyata keçirdiyi bütün tədbirlərdə istər onlayn, istərsə də fiziki şəkildə iştirak edək. Bu tip ənənəvi tədbirlərdən biri də Almaniyanın Frankfurt şəhərində keçirildi. Avropa Liqalarının (European Leagues) 50-ci Baş Assambleyasını önəmli edən bir çox məqamlar var idi. Bu tədbirdə İsveç Futbol Liqasının rəsmisi Klaudius Şafer Avropa Liqalarının prezidenti seçildi, Direktorlar Şurasının yeni heyəti açıqlandı və La Liqanın yenidən Avropa Liqalarına qoşulması rəsmiləşdi. Bizim üçün Liqanın tərkib hissəsi kimi səsvermə hüququndan istifadə etmək də xoş oldu".

E.Abbasov bu cür tədbirlərə qatılmağın onlar üçün prioritet olduğunu vurğulayıb:

"50-ci Baş Assambleyada bir sıra fərdi görüşlərdə iştirak edərək, müxtəlif ölkələrdən gələn nümayəndələrlə fikir mübadiləsi apardıq. Görüşlər zamanı qarşı tərəfi Azərbaycan futbolunda baş verən yeniliklərlə bağlı məlumatlandırdıq. Bu tip tədbirlərdə iştirak etmək Peşəkar Futbol Liqası üçün hər zaman prioritet məsələ olaraq qalacaq".