Azərbaycanın voleybol millisi Avropa Qızıl Liqasının hazırlığna start verib

Qadın voleybolçulardan ibarət Azərbaycan millisi Avropa Qızıl Liqasının hazırlığına start verib.

"QELEBE.AZ" xəbər verir ki, bu məqsədlə baş məşqçi Faiq Qarayevin rəhbərliyi ilə voleybolçularla iclas keçirilib.

Gənclər və İdman Nazirliyinin Voleybol Mərkəzində bu gün baş tutan görüşdə hazırda ölkədə olan milli üzvləri, gənc voleybolçular, məşqçilər korpusu, federasiya nümayəndələri iştirak ediblər.

Əvvəlcə hər kəsi salamlayan Faiq Qarayev Avropa Qızıl Liqasında iştirak edəcək yığmaya uğurlar arzulayıb. O, bu gündən məşqlərə start verildiyini bildirib və yarışın hazırlıq prosesi haqqında ətraflı məlumat verib. F.Qarayev komandanın bir neçə gün Bakıda məşq edəcəyini, sonra isə təlim-məşq toplanışına yollanacağını deyib.

Daha sonra millinin oyunçularından Katerina Jidkova və Aynur İmanova çıxış ediblər. Voleybolçular yarışda yüksək səviyyədə çıxış etmək üçün əllərindən gələni edəcəklərini bildiriblər və hər kəsə uğurlar arzulayıblar.