Millinin keçmiş kapitanı: “Yığma dəftərini bağlamışam”

“Düşünürəm ki, milli karyera mənim üçün başa çatıb. Yığma dəftərini bağlamışam”.

Bunu “Report”a müsahibəsində “Səbail”in futbolçusu Rahid Əmirquliyev Azərbaycan millisinə çağırılmamasına münasibət bildirərkən deyib.

Sonuncu dəfə 2018-ci ilin yanvarında Moldova (0:0) ilə yoldaşlıq görüşündə yığmanın formasını geyinən 33 yaşlı yarımmüdafiəçi artıq bütün diqqətini klub karyerasına yönəltdiyini söyləyib: “Doğrudur, çoxdandır milliyə çağırılmıram. Orada hansısa siyahıda olub-olmadığımı da bilmirəm. Bununla heç maraqlanmamışam. Klub karyeramın nə qədər davam edəcəyini bilmirəm. Amma yığma karyeramın yekunlaşdığını deyə bilərəm”.

Əmirquliyev karyerası ərzində 60 oyunda şərəfini qoruduğu Azərbaycan millisinin AVRO-2024-ün seçmə qrup mərhələsindəki şanslarını da dəyərləndirib. Sabiq kapitan F qrupunda Belçika, Avstriya, İsveç və Estoniya ilə mübarizə aparacaq Canni De Byazinin kollektivinin işinin çətin olacağını vurğulayıb: “Yığmanın son 5 oyunda ardıcıl qələbələr qazanması sevindirici haldır. Bunu həmişə arzulamışıq. Ancaq nəzərə alaq ki, bunlar Millətlər Liqasında əhəmiyyəti qalmayan oyunlar və yoldaşlıq görüşləri idi. Rəsmi matçla sınaq qarşılaşması arasında çox böyük fərq var. Buna görə də hesab edirəm ki, Avropa çempionatının seçmə mərhələsində mübarizə çətin olacaq. Çünki böyük komandalarla matçlar keçiriləcək. Qrupda yalnız Estoniya ilə başabaş oynamaq olar. Digər komandalar çox güclüdürlər. Hamımız istərdik ki, qələbə seriyasının davamı gəlsin. Qrupda güclülərdən hansınısa büdrədə bilərik. Amma ilk iki yer uğrunda yarışmaq real görünmür”.

Rahid Əmirquliyevin müsahibəsinin tam versiyasını buradan oxuya bilərsiniz.