BƏƏ millisinin azərbaycanlı həkimi: "Milli Gimnastika Arenasını möhtəşəm vəziyyətdə görmək məni çox həyəcanlandırdı"

BƏƏ minifutbol yığmasının azərbaycanlı terapevt-həkimi Faiq Hüseynov Bakıda keçirilən dünya çempionatı ilə bağlı fikirlərini bölüşüb.

Mütəxəssis “QELEBE.AZ”a açıqlamasında mundialın təşkil olunduğu Milli Gimnastika Arenası barədə xoş sözlər deyib.

O, belə möhtəşəm tədbirin keçirilməsi üçün böyük işlər görüldüyünü deyib:

"Prezident İlham Əliyevə, Azərbaycan Minifutbol Federasiyasının rəhbərliyinə təşəkkürümü bildirirəm. Bakıda bu cür idman tədbirlərinin keçirilməsi üçün böyük işlər görülüb. Öz Vətənimə gəlib, Milli Gimnastika Arenasını möhtəşəm vəziyyətdə görmək məni çox həyəcanlandırdı. Təşkilatçılıq, sadəcə, möhtəşəmdir".

F.Hüseynov Azərbaycan futboluna faydalı olmaq arzusunu da dilə gətirib:

"1987-ci ildən futbolda çalışıram. İsgəndər Cavadov, Maşallah Əhmədov kimi futbolçuların dövründən fəaliyyətdəyəm. Çox istərdim ki, Azərbaycanın futbol yığmasından dəvət alım. Orada çıxış edən oyunçulara töhfə vermək, Azərbaycan futboluna faydalı olmaq istəyirəm. Mən futbolla nəfəs alan insanam. İnanıram ki, bir gün yığmadan iş təkıifi alacağam".

Qeyd edək ki, Faiq Hüseynovun çalışdığı BƏƏ yığması dünya çempionatında keçirdiyi hər iki matçda məğlub olub və qrupdan çıxmaq şanslarını itirib.