ARAF rəsmisi: "Çövkən yığmamızın Avropa çempionu olması milli kimliyimizin, tariximizin və mədəni irsimizin təntənəsidir"

Azərbaycan Respublikası Atçılıq Federasiyasının (ARAF) baş katibi Emil Seyidov çövkən üzrə Azərbaycan millisinin Polşada keçirilmiş Avropa çempionatında qızıl medal qazanmasına münasibət bildirib.

ARAF rəsmisi bu barədə "QELEBE.AZ"a açıqlama verib.

O, bu növ üzrə Avropa çempionatının ilk dəfə keçirildiyini xatırladıb:

"Azərbaycan komandasının çempion olması həqiqətən də böyük qüruq hissi idi. Çövkən millimizin Avropa çempionu olması təkcə idman uğuru deyil, həm də milli kimliyimizin, tariximizin və mədəni irsimizin təntənəsidir. Bu tarixi qələbə bizi sonsuz qürur hissi ilə doldurur. Çövkən əsrlərdir xalqımızın ruhunda, mədəni yaddaşında yaşayan bir oyundur. Bu gün onun beynəlxalq arenada parlaması, Avropa çempionluğu səviyyəsində tanınması Azərbaycanın qədim atçılıq ənənələrinin bərpası və dünyaya tanıdılması baxımından mühüm əhəmiyyət daşıyır".

Onun sözlərinə görə, bu uğur həm də ölkədə çövkənə göstərilən diqqət və qayğının, sistemli fəaliyyətin və idmançılarımızın əzminin nəticəsidir:

"Ümid edirəm ki, bu qələbə yeni nəsillər üçün də ilham mənbəyi olacaq və çövkənə marağı daha da artıracaq. Bu münasibətlə milli komandamızın üzvlərini, məşqçiləri və bu işə töhfə verən hər kəsi ürəkdən təbrik edirəm. Qarşıda bizi daha böyük hədəflər gözləyir və bu uğur həmin yolda möhkəm bir başlanğıcdır".

Qeyd edək ki, Azərbaycan millisi Avropa çempionatının final matçında Maltanı 6:2 hesabı ilə üstələyib.