Dünya Taekvondo Federasiyasının nümayəndəsi: “Bakıdakı mundialın keçiriləcəyi məkan müqayisəolunmazdır”

“Bakıdakı dünya çempionatının keçiriləcəyi məkan müqayisəolunmazdır”.

“Report” xəbər verir ki, bunu Dünya Taekvondo Federasiyasının nümayəndəsi Məhəmməd Şaaban Bakı Kristal Zalında baş tutacaq mundiala son hazırlıqlarla bağlı təşkil olunan mətbuat konfransında deyib.

O bildirib ki, Azərbaycana ikinci dəfədir səfər edir: “Bundan əvvəl 2017-ci ildə Qran Pri finalına qatılmışdım. O, olimpiadadan sonra idi. Artıq altı il keçib, bu illər ərzində böyük dəyişikliklərin şahidi oldum. Şəhər də çox dəyişilib”.

Məhəmməd Şaaban tədbirə hazırlıqdan məmnun qaldıqlarını söyləyib: “Dünən Təşkilat Komitəsi ilə ilk dəfə üzbəüz görüş keçirdik. Təşkilat Komitəsində tədbirin keçirilməsi üçün yüksək səviyyəli hazırlığın şahidi oldum. Çünki burada logistika, təşkilati baxımdan böyük işlər görülməlidir. Nəzərə almaq lazımdır ki, 1500-dən çox insan gələcək. Onların müxtəlif məkanlara aparılması, yerləşməsi kimi böyük proseslər olacaq. Düşünürəm ki, bütün bunlar yüksək səviyyədə ərsəyə gələcək”.

Dünya Taekvondo Federasiyasının nümayəndəsi Bakıdakı mundialda yeni ulduz taekvondoçuların üzə çıxacağına inanır: “Koronavirus pandemiyası səbəbindən ötən il keçirdiyimiz dünya çempionatında da yeni adlar kəşf olunmuşdu. Müşahidələrimiz onu göstərir ki, daha çox gənclər yaxşı yer tuturlar. Onu da unutmayaq ki, bu mundial gələn il keçiriləcək Yay Olimpiya Oyunlarından əvvəlki ən böyük tədbirimizdir. Bu da o deməkdir ki, hamı yüz faizlik nəticə ilə dünya çempionatından ayrılmaq istəyəcək. Azərbaycanlı azarkeşlər üçün maraqlı tədbir olacaq. Yeddi gün ərzində diqqətçəkən anlar yaşanacaq. Ümid edirəm ki, Azərbaycanda taekvondo sevənlər bu dünya çempionatından zövq alacaqlar”.

Qeyd edək ki, dünya çempionatı mayın 29-dan iyunun 4-dək keçiriləcək.