"Qarabağ"ın rəqibi "Marsel"in hücumçusunu transfer edir

"Qarabağ"ın UEFA Avropa Liqasının qrup mərhələsindəki rəqiblərindən olan Yunanıstan "Olimpiakos"u daha bir futbolçu transferini yekunlaşdırmaq üzrədir.

"Report" xəbər verir ki, bu barədə italiyalı insayder Fabritsio Romano özünün sosial şəbəkə hesabında paylaşım edib.

Onun sözlərinə görə, Pirey təmsilçisi Fransa "Marsel"ində çıxış edən Sedrik Bakambu ilə anlaşıb. 31 yaşlı fransalı hücumçu yaxın günlərdə yeni klubu ilə müqavilə imzalayacaq.

Qeyd edək ki, "Olimpiakos" daha əvvəl kolumbiyalı Xames Rodriges və braziliyalı Marselo kimi tanınmış futbolçuları heyətinə qatıb. "Qarabağ" bu rəqibə qarşı ilk oyununu oktyabrın 6-da səfərdə, növbəti görüşünü isə bundan bir həftə sonra Bakıda keçirəcək.