"Səbail" rəsmisi: "Futbolçu həmin an alt paltarını düzəldib"

"Futbolçu həmin anda uğursuz oturan alt paltarını düzəldib".

Bunu "Report"a açıqlamasında "Səbail"in mətbuat xidmətinin rəhbəri Sənəm Fərhadova "Turan Tovuz"la bərabərə qaldıqları Azərbaycan Premyer Liqasının XXXV tur matçında oyunçuları Qoba Zakpanın etdiyi hərəkət barədə danışarkən deyib.

Klub rəsmisinin sözlərinə görə, 31 yaşlı portuqaliyalı hücumçu rəqibə və azarkeşlərə hörmət etdiyini söyləyib: "Futbolçu qol vurduqdan sonra sevincini yaşayıb. Bizim sosial şəbəkə hesablarımızda da paylaşım olub. O, həmin vaxt uğursuz oturan alt paltarını düzəldib. Daha sonra növbəti komanda yoldaşından təbriki qəbul edib. Həmin zaman alt paltarında problem aşkarlanıb. Bunu özü də dedi. Qətiyyətlə bildirdi ki, bu cür qeyri-etik hərəkət etməz. Bu hadisə baş verəndə aydın şəkildə görünür ki, Qoba Zakpa üzünü nə azarkeşlərə, nə də rəqibə tərəf yönəldib. Oyunçu ilə söhbət aparılıb, bir daha yanlış anlaşılma yaşanmasın deyə ehtiyatlı olmağın lazımlığı bildirilib. O, bundan sonra daha ehtiyatlı olacağını söyləyib".

Qeyd edək ki, qarşılaşma 2:2 hesabı ilə yekunlaşıb. Paytaxt təmsilçisinin sonuncu qolunu 90+3-cü dəqiqədə Qoba Zakpa vurub.