Boks üzrə Azərbaycan çempionatının açılış mərasimi olub

Boks üzrə Azərbaycan çempionatının açılış mərasimi keçirilib.

"QELEBE.AZ"un məlumatına görə, Boks Mərkəzində təşkil olunan tədbirə Azərbaycan Boks Federasiyasının vitse-prezidenti Vüsal Nəsirli, iştirakçı komandaların məşqçiləri, hakimlər, idmançılar və digər rəsmi şəxslər qatılıb.

İlk olaraq komandalar arenaya dəvət olunublar. Daha sonra Vətən Müharibəsi şəhidlərinin övladları Azərbaycanın tanınmış boksçuları ilə birlikdə rinqə çıxıblar.

Dövlət Himninin səsləndirilməsindən sonra şəhid övladlarına hədiyyələr verilib və onlarla xatirə fotosu çəkdirilib.

Ardınca şəhidlərin ruhu bir dəqiqəlik sükutla yad olunub.

Vüsal Nəsirli ölkədə idmanın bütün növlərində olduğu kimi, boksa da xüsusi diqqət ayrıldığını bildirib. Federasiya rəsmisi Azərbaycanın bir sıra mötəbər yarışlara ev sahibliyi etdiyini xatırladıb:

"Bu çempionat əvvəlkilərdən fərqlənəcək. Bu dəfə yarışa daha çox komanda və boksçu qatılıb. Ümid edirəm ki, yığma komandamız Paris-2024-də ölkəmizə ilk olimpiya qızılını qazandıracaq. Güclü qalib gəlsin. Allah şəhidlərimizə rəhmət etsin, qazilərimizə cansağlığı versin".

Son olaraq hakimlərin andiçmə mərasimi baş tutub və Azərbaycan çempionatı açıq elan olunub.

Qeyd edək ki, çempionata respublikanın müxtəlif şəhər və rayonlarının klublarını, həmçinin idman cəmiyyətlərini təmsil edən 38 komandanın 146 boksçusu qatılıb.

Bu gün start götürən yarışda qaliblərin adına oktyabrın 25-də aydınlıq gələcək. Mükafatçılar yığmanın heyətinə cəlb olunacaq və beynəlxalq yarışlarda ölkəni təmsil edəcəklər.

Turnirin baş hakimi Emil Qurbanəliyev olacaq. Döyüşləri yerli referilərlə yanaşı, xarici ədalət təmsilçiləri, İBA-nın 3 ulduz kateqoriyasına, həmçinin dünya çempionatı və Yay Olimpiya Oyunları təcrübəsinə malik türkiyəli Yaşar Çinar, Rəcəb İtməz, Özbəkistandan olan Aleksandr Hamidov və Qəhrəman Kazımov da idarə edəcək.