Avropa Liqası: Pley-offun püşkü atılıb

Avropa Liqasında pley-off mərhələsinin püşkü atılıb.

Apasport.az saytının məlumatına görə, qitənin ikinci dərəcəli klub turnirində mübarizəni davam etdirən 24 komandadan 16-sı 8 cütlük təşkil edib.

1/8 finala vəsiqələr uğrunda mübarizədə turnirin qrup mərhələsində ikinci yeri tutanlarla Çempionlar Liqasında üçüncü pillə ilə kifayətlənənlər üz-üzə gələcək. İlk matçlar daha güclü turnirin uğursuzlarının meydanında baş tutacaq.

Püşk kuboka iki iddialını pley-offda üz-üzə qoyub. “Barselona” və “Mançester Yunayted” 1/8 finala vəsiqə üçün mübarizə aparacaq.

Pley-offun qarşılaşmaları 2023-cü ildə təşkil olunacaq. İlk matçlar fevralın 16-da, cavab görüşləri 23-də keçiriləcək.

Avropa Liqası
Pley-off mərhələsi
“Barselona” (İspaniya) - “Mançester Yunayted” (İngiltərə)
“Yuventus” (İtaliya) - “Nant” (Fransa)
“Sportinq” (Portuqaliya) - “Midtulland” (Danimarka)
“Şaxtyor” (Ukrayna) - “Renn” (Fransa)
“Ayaks” (Niderland) - “Union” (Almaniya)
“Bayer” (Almaniya) - “Monako” (Fransa)
“Sevilya” (İspaniya) - PSV (Niderland)
“Zalsburq” (Avstriya) - “Roma” (İtaliya)

Qeyd edək ki, Avropa Liqasında qrup qalibi olan 8 komanda – “Arsenal” (İngiltərə), “Betis” (İspaniya), “Fənərbaxça” (Türkiyə), “Ferensvaroş” (Macarıstan), “Feyenoord” (Niderland), “Frayburq” (Almaniya), “Real Sosyedad” (İspaniya) və “Sent Jiloaz” (Belçika) birbaşa 1/8 finala yüksəlib.