FİFA agenti imtahanının xərclərini AFFA qarşılayıb

FİFA agenti lisenziyası almaq istəyən şəxslər üçün imtahanın xərclərini AFFA qarşılayıb.

Bu barədə “QELEBE.AZ”a açıqlamasında FİFA agenti məsələləri üzrə məsul şəxs Nurlan Zeynalzadə deyib.

AFFA Hüquq Departamentinin əməkdaşı bildirib ki, seminar Azərbaycanda ilk dəfə təşkil edildiyindən, maraq yaratmaq üçün iştirakçılar imtahana ödənişsiz qatılıblar: “Sınaq imtahanını FİFA keçirdiyi üçün biz sualları və cavabları görə bilmirik. AFFA sadəcə, imtahanın təşkilatçısıdır, bunun şəffaf aparılmasına nəzarət edir və imtahandan keçən şəxslərə lisenziyanın təqdim olunması kimi məsələlərə baxır. İmtahanın xərclərini də AFFA qarşıladı. Əslində, digər federasiyalarda imtahan üçün kifayət qədər yüksək məbləğdə ödəniş olunur. Hətta bu, FİFA-nın təyin etdiyi lisenziya haqqından artıq məbləğdir. İnsanlarda maraq yaratmaq üçün bu addımı atmaq qərarına gəldik”.

Onun sözlərinə görə, imtahandan müvəffəqiyyətlə keçəcək şəxslər lisenziya haqqı ödəməklə FİFA agenti olacaqlar: “Onlar ali futbol qurumunun yeni qaydalarına əsasən, 600 dollar illik lisenziya haqqı ödəməli olacaqlar”.

Nurlan Zeynalzadə vurğulayıb ki, ali futbol qurumu növbəti imtahanın vaxtını hələ müəyyənləşdirməyib: “FİFA hələlik ildə iki imtahan nəzərdə tutub. Bu il aprel və sentyabrda aylarında oldu. FİFA ən azı üç ay öncədən imtahanın vaxtını elan edir. Bundan əvvəl isə milli assosiasiyalara məlumat verir ki, hazırlıqlara başlanılsın”.