Vüsal İsayev: “Fiziki hazırlıq sayəsində yarımfinala adladıq”

“Fiziki hazırlıq sayəsində yarımfinala adladıq”.

Bunu “QELEBE.AZ”a açıqlamasında Azərbaycan minifutbol millisinin üzvü Vüsal İsayev Birləşmiş Ərəb Əmirliklərinin Ras Əl-Xayma şəhərində təşkil olunan dünya çempionatının 1/4 finalında Bolqarıstana qarşı keçirilən oyunla bağlı danışarkən deyib.

25 yaşlı futbolçu 3:1 hesablı qalibiyyəti komandanın fiziki gücü ilə əlaqələndirib: “Oyunlar getdikcə çətinləşir. Bolqarlarla görüşdə hiss etdik ki, kim az səhvə yol versə, o da qələbə qazanacaq. Rəqib birinci hissədə yaxşı qapanmışdı. Komandamızın isə fiziki hazırlığı yüksək səviyyədədir. Çünki dünya çempionatından əvvəl Antalyada təlim-məşq toplanışı keçmişik”.

V.İsayev yarımfinaldakı rəqib Qazaxıstanı da məğlub etmək iqtidarında olduqlarını söyləyib: “Avropa çempionatının yarımfinalında da Qazaxıstanla qarşılaşmışdıq. Finala bir şey qalmayıb. Xalqımızı sevindirmək, qələbə qazanmaq üçün bütün gücümüzü ortaya qoyacağıq. Komandada zədəli futbolçunun olmaması bizim üçün üstünlükdür. Səhv etmirəmsə, Qazaxıstanın iki futbolçusu cəzalı durumdadır”.

Qeyd edək ki, bu gün keçiriləcək Azərbaycan - Qazaxıstan görüşü Bakı vaxtı ilə saat 20:30-da başlayacaq.