Türkmənistan hokkeyçiləri uduzduqları matçdan sonra rəqibə hücum ediblər

Türkmənistan yığmasının hokkeyçiləri Qış Asiya Oyunlarının qrup mərhələsində Honkonqa məğlub olduqları matçdan (1:5) sonra rəqib oyunçulara hücum ediblər.

"Report" xəbər verir ki, bu barədə Honkonq Olimpiya Komitəsinin mətbuat xidməti məlumat yayıb.

Türkmənistan komandasının üzvləri - Erkin Kakabayev, Arslan Geldimiradov və Beqenç Dovletmiradov matçdan sonra əlsıxma zamanı Honkonq millisinin üzvlərinə hücum etsələr də, rəqib hokkeyçilər ciddi xəsarət almayıblar.

Bununla bağlı bəyanat yayan Honkonq Olimpiya Komitəsi Beynəlxalq Hokkey Federasiyasına (IIHF), Asiya Olimpiya Şurasına (OCA) və oyunların təşkilində iştirak edən müvafiq təşkilatlara müraciət ünvanlayaraq idmançıların təhlükəsizliyinin təmin olunmasını tələb edib.

Hadisə ilə əlaqədar türkmənistanlı hokkeyçilər cərimələniblər.